Әбілқас Сағынов атындағы ҚарТУ, Басқарма мүшесі — Стратегиялық даму және цифрландыру жөніндегі проректор Тимур Канапьянов тұлғасында Ұлыбритания Елшілігімен бірлесіп ұйымдастырылған трансұлттық білім берудің сапасын қамтамасыз ету мәселелеріне арналған семинарға қатысты. Іс-шара Ұлыбритания Елшісі Кэти Лич ханымның резиденциясында өткен ресми қабылдаумен аяқталды.
2024 жылдың желтоқсанынан 2025 жылдың наурызына дейін қазақстандық жоғары оқу орындарының ұлттық сарапшылары мен Ұлыбританияның QAA (Quality Assurance Agency for Higher Education) агенттігінің халықаралық мамандары Трансұлттық білім берудің сапасын қамтамасыз ету жөніндегі Негіздемені әзірледі. Бұл құжат Қазақстанда іске асырылатын халықаралық білім беру бағдарламаларының сапасын арттыруға бағытталған қағидаттар мен стандарттар жүйесін ұсынады.
Семинар барысында осы жобаның алдын ала есептерінің нәтижелері ұсынылды. Іс-шараның негізгі мақсаты – ұсынылған қағидаттар мен сапаны бақылау тетіктерін Қазақстан университеттері, аккредиттеу агенттіктері және ҚР Ғылым және жоғары білім министрлігі өкілдерінің кең аудиториясымен талқылау болды.
Семинар трансұлттық білім беру саласындағы негізгі мәселелер мен болашақ мүмкіндіктерді талқылау, сондай-ақ аккредиттеу мен сапаны бақылаудың сенімді және тиімді жүйесін құру бойынша стратегиялық қадамдарды анықтау үшін маңызды алаңға айналды.
Әбілқас Сағынов атындағы ҚарТУ халықаралық ынтымақтастықты дамыту және оқу процесіне озық тәжірибелерді енгізу жұмыстарын жалғастыруда, әлемдік стандарттарға сәйкес келуге және жоғары деңгейдегі мамандар даярлауға ұмтылады.