2024 жылдың 1-25 сәуір аралығында Мәскеу политехникалық университетінде «СНК-2024» халықаралық студенттік ғылыми конференциясы өтті.
1950 жылдан бастап Мәскеу политехникалық университеті ұйымдастырып келе жатқан Халықаралық студенттік ғылыми конференция университеттегі ең маңызды және ауқымды ғылыми оқиғалардың бірі болып саналады. Оның жұмысы барысында студенттерге басқа қатысушыларды өздерінің ғылыми зерттеулерінің, жобаларының нәтижелерімен таныстыруға, тәжірибесімен, білімімен алмасуға, сондай-ақ жетекші оқытушылардың, ғалымдар мен сарапшылардың бағасын алуға бірегей мүмкіндік беріледі.
Конференцияға Әбілқас Сағынов атындағы ҚарТУ студенті (СИБ-22-6 тобы) Раульев Серик қатысты. Ол «Табиғи тілді өңдеу және зейнеткерлік жастағы адамдарды оқыту саласындағы жасанды интеллект» атты баяндама дайындады.
Конференция қорытындысы бойынша С. Раульев «Перспективалы ақпараттық технологиялар және цифрлық экономика» ашық секциясында II орын алғаны үшін дипломмен марапатталды. Секциялық отырыстарда сөз сөйлеу үшін 1426 өтінім берілгенін, оның 1120-сы мақұлданғанын атап өткен жөн.
Жүлдегерді дайындаған «Ақпараттық технологиялар және қауіпсіздік» кафедрасының ассистенті Абдин Азат Жасуланович алғыс хатпен марапатталды.
