Қарағандыда Қазақстан Республикасының Ғылым және жоғары білім министрлігі мен Қарағанды облысының әкімдігі бірлесіп ұйымдастырған шетелдік жоғары оқу орындарының филиалдары көрмесі өтті. Бұл шара мектеп бітірушілеріне болашақ мамандықтарын анықтауға және жоғары білім алудың оңтайлы жолын таңдауға көмектесетін маңызды қадам болды.
Көрмеге білім беру саласының өкілдері қатысты, олардың қатарында Қарағанды облысының жастар саясаты мәселелері басқармасының басшысы Нұржан Ильяш, Ғылым және жоғары білім министрінің кеңесшісі Руслан Емелбаев, Ұлттық тестілеу орталығы директорының орынбасары Наужан Дидарбекова, кәсіби бағдар беруші Бақытжан Жұмашев және еліміздің жетекші жоғары оқу орындарының өкілдері бар. Спикерлер мектеп оқушылары мен олардың ата-аналарына шетелге шықпай-ақ халықаралық диплом алу мүмкіндіктері туралы ақпарат берді.
«Бүгінгі көрме түлектерге Қазақстанда ашылған шетелдік жоғары оқу орындарының білім беру бағдарламаларымен танысуға мүмкіндік береді. Қазіргі уақытта 23 шетелдік университетпен стратегиялық серіктестік орнатылған, ал тағы 11 университетпен келіссөздер жүргізілуде. Бұл қазақстандық жастардың білім көкжиегін кеңейтеді, өйткені мұндай жоғары оқу орындарында оқу мемлекеттік гранттардың қолдауымен халықаралық білім стандарттарына қол жеткізуге мүмкіндік береді», — деп атап өтті Ғылым және жоғары білім министрінің кеңесшісі Руслан Емелбаев.
Шетелдік университет филиалдары өңірлердің қажеттіліктеріне сәйкес ашылуда. Көрмеде еңбек нарығы мен Қазақстанның өндірістік секторына бейімделген жоғары оқу орындары ұсынылды. Абитуриенттер арасында ең танымалдарының бірі 2022 жылдан бері Ақтөбедегі Zhubanov University базасында жұмыс істейтін шотландиялық HERIOT WATT UNIVERSITY болды. Қазіргі уақытта бұл университетте 600-ге жуық студент білім алуда, ал жоғары оқу орны түлектерді жоғары рейтингі және қолжетімді қабылдау шарттарымен тартады.
«HERIOT WATT UNIVERSITY-ге түсу үшін ҰБТ нәтижелері жеткілікті, ал ағылшын тілін білу IELTS орнына ішкі емтихан арқылы расталады. Бұл қазақстандық талапкерлер үшін оқуға түсу процесін айтарлықтай жеңілдетеді. Сонымен қатар, біздің студенттеріміз университеттің Малайзия, Дубай және Эдинбургтегі филиалдарында білім алып, тәжірибе алмаса алады», — деді Zhubanov University-дің «Математика» кафедрасының оқытушысы Асқарбек Иманшеев.
Көрме мектеп оқушылары мен олардың ата-аналары арасында үлкен қызығушылық тудырды, өйткені олар Қазақстанда халықаралық деңгейде білім алу мүмкіндіктері туралы өзекті ақпарат алды.
«Мен қос диплом алу және бұған дейін білмеген мүмкіндіктер туралы ақпарат алдым. Әсіресе, физика-математика бағытындағы бағдарламалар ұсынатын жоғары оқу орындарымен танысу пайдалы болды. Енді мен қай бағытта қозғалатынымды жақсырақ түсіндім», — деп әсерімен бөлісті түлек Анар Әлжаппар.
Жоғары оқу орындарының стендтері мен олардың өкілдерімен кездесулерден бөлек, көрме аясында шеберлік сыныптар, интерактивті ойындар және викториналар ұйымдастырылды. Бұл абитуриенттерге өздерінің қызығушылықтары мен белгілі бір мамандықтарға бейімділіктерін жақсырақ түсінуге көмектесті.
Айта кетейік, бүгін Қарағандыда басталған көрме 15 күнге созылып, Астана, Алматы, Тараз, Шымкент, Түркістан және Қызылорда қалаларында өтеді. Бұл — тек алғашқы кезең, кейін мұндай шаралар еліміздің басқа өңірлерінде де ұйымдастырылады. Ұйымдастырушылар іс-шараны ұйымдастыруға атсалысқан Әбілқас Сағынов атындағы Қарағанды техникалық университетіне алғыс білдірді. Олардың пікірінше, мұндай бастамалар мектеп түлектеріне саналы таңдау жасауға және болашақ білім мен мансап жолында үздік мүмкіндіктерді табуға көмектеседі.
