ҚР Қаржы мониторингі агенттігі халықтың қаржылық сауаттылығын арттыру және алаяқтықтың алдын алу мақсатында «АФМ ONLINE 2024» республикалық онлайн-форумын өткізді.
Бұл мәселенің қаншалықты маңызды екенін сандар көрсетеді. Осы жылдың басынан бастап-ақ Қазақстанда 16 қаржы пирамидасының қызметі тоқтатылды, алаяқтық жобалардың белгілері бар 180-ге жуық чат және 10 мыңға жуық сайт бұғатталды.
Алаяқтар қолданатын заңсыз схемаларды тану оңай емес. Сондықтан халықтың және әсіресе оның осал бөлігінің — бос уақытының көп бөлігін әлеуметтік желілерде өткізетін жастардың қаржылық сауаттылығын арттыру өте маңызды. Сондықтан онлайн-форумға еліміздің 35 жетекші жоғары оқу орнының студенттері тартылды, олардың алдында депутаттар мен бейінді министрліктердің басшылары, қаржы талдаушылары, қоғам қайраткерлері, белгілі медиаторлар мен блогерлер сөз сөйледі.
Қарағандыда онлайн-форумға арналған алаңдардың бірін Әбілқас Сағынов атындағы Қарағанды техникалық университеті ұсынды. Мұнда конференц-залда облыстың билік органдарының, ЖОО басшылығының өкілдері, қоғам қайраткерлері мен студенттер жиналды.
Үш сағаттық онлайн-форум барысында ақшаны алаяқтардан қорғауға, адамдарды қаржы пирамидаларына тарту механизмдеріне және олардың негізгі белгілеріне қатысты көптеген өзекті сұрақтарға толық жауаптар берілді. Талқылау барысында блогерлердің құқықтық қызметіне, жарнаманы заңсыз орналастыруға қатысты заңнама нормаларын түсіндіруге ерекше назар аударылды.
Форумда айтылғандардың бәрінен мынадай қорытынды шығаруға болады: алаяқтықпен, қаржы пирамидаларымен күресу үшін бүкіл қоғамды шоғырландыру, халықтың қаржылық сауаттылығын арттыру қажет. Өткізілген онлайн форум бұл жолда тағы бір маңызды қадам жасағанына күмән жоқ.
